Nga Alteo HYSI
Laguna e Karavastasë është një prej 12 Parqeve Kombëtare që Shqipëria ka dhe për nga vlerat e biodiversitetit ka një rëndësi të veçantë. Kjo lagunë është pika me perëndimore në Europë ku folezon pelikani kaçurrel (pelicanus crispus). Këtu gjendet 5 % e popullimit të tij botëror. Për këto vlera që prej vitit 1994 laguna e Karavastasë ndodhet nën ruajtjen ndërkombëtare të Konventës së Ramsarit.
Në Lagunën e Karavastasë ndodhet i vetmi vend shumimi për Pelikanin (Pelecanus crispus), një specie e rrezikuar globalisht. E pikërisht prej rrezikut i është kushtuar gjithnjë vëmendje e veçantë.
E kontaktuar nga Opinion.al, Ministria e Mjedisit vuri në dispozicion të dhëna që vijnë nga inventarizimi më i fundit në Parkun Kombëtar të Divjakës- Karavasta, i cilësuar si zona më e rëndësishme për shpendët në Shqipëri.
Sipas këtyre të dhënave, në park ndodhen 147 individë Pelikanë (Pelecanus onocrotalus), çfarë tregon se prezenca e Pelikanit në lagunë është në maksimumin e vet. Inventarizimi ne Parkun Kombetar Divjake – Karavasta, i konfirmuar në 24-25 Janar 2015 tregon se Parku sot strehon 45 lloje të ndryshme shpendësh të ujit dimërues me afro 42.400 individë ose dy herë më shumë se në janarin e vitit 2014.
Taulant Bino, Drejtor Ekzekutiv i Shoqatës Mjedisore “Albania Ornithological Society” pohon se në krahasim me vitin 2014 situata është përmirësuar dhe për këtë i referohet çifteve riprodhuese të pelikanit.
Në 2014 sipas Binos kishte vetëm 37 çifte riprodhuese, ndërsa këtë vit 46.
E njëjta panoramë shpresëdhënëse konfirmohet për opinion.al nga Ardian Koçi, Drejtor i Administratës së zonave të mbrojtura Fier.
“Për momentin pelikanët janë të shpërndarë dhe mblidhen në fund të dhjetorit, ndërsa pritet që kur të mblidhen, numri të shkojë në 200”, thotë Koçi.
Megjithatë, mungesa e oksigjenit në ujërat e lagunës sipas drejtuesit lokal, e dëmton indirekt pelikanin sepse rrallon ushqimin e tij, peshqit.
Kështu, duket se Lagunës i është rikthyer qetësia, në të cilën mbretërojnë vetëm shpendët dhe peisazhi piktoresk.
