Deputeti më i ri i Kuvendit, Ligoraq Karamelo flet për një pol të ri politik, që sipas tij do të zëvendësojë opozitën. Nga Korça ai ka thënë se në Kuvend do të ketë prurje të reja për të shtuar numrin e deputetëve në radhët e opozitës.
Madje karamele shkon edhe më tej teksa pohon se kjo opozitë e re do të çojë përpara proceset integruese dhe reformën në drejtësi.
“Unë jam një opozitar, i qëndroj linjës sime të opozitës dhe ende nuk e kemi bërë deklarimin cilën parti do përfaqësojmë. Unë jam pjesë e PBDNJ, në marrëveshjen e 2017 nuk u lejua kandidimi i partive të vogla dhe partitë e koalicionit u futën në listën e PD. Përfaqësoj elektoratin tim, ne jemi një elektorat i konsoliduar, kemi ndihmuar PD në 2017 dhe është ky elektorat që më sugjeroi të bëhem pjesë e Parlamentit. Sa i takon polit të ri politik, ne jemi duke ristrukturuar forcat opozitare, priten prurje të tjera për të shtuar numrin e deputetëve në radhët e opozitës. Bëhet fjalë për një opozitë në parlament që do të marrë përsipër që të çojë përpara proceset integruese, reformën në drejtësi, është opozita e re që po krijohet në Parlament”.
Karamelo u bë pjesë e Kuvendit pasi mori vendet e lëna bosh nga demokratet në listën e Korçës. Ai ishte futur në këtë listë si përfaqësues i PBDNJ, e cila u bë koalicion me PD në atë që u quajt Republika e re.
Por në fakt deklarata e Ligoraq Karamelos ngjason me atë të Edi Ramës, i cili nga foltorja e Kuvendit ka thënë se me opozitën e re do të shkojnë në Bruksel, pasi të kenë përfunduar dhe reformën zgjedhore, një nga pikat e parealizuar që kërkohet për çeljen e negociatave. /Opinion.al
