Policia greke çmontoi një rrjet të strukturuar kriminal që merrej me prostutucionin VIP, duke përdorur si maskim modelimin. Me dhjetra femra nga Shqipëria rezultojnë të kontraktuara nga ky grup, që siguronte takime speciale me klientë të rëndësishëm.
Siç raporton “Huffingtonpost.gr”, organizata kishte hapur pesë zyrat erotike për takime, dy prej të cilave veprojnë në Athinë dhe të tjerat në Selanik, Francë dhe Gjermani. Në total 30 femra mendohet se bënin pjesë në këtë rrjet, ku më parë ishin regjistruar në dhjetra faqe rozë.
Katër nga të pandehurit mund të gjenin gra në vende si Sllovenia, Rusia, Shqipëria, etj. Rrjeti kishte 25 shoferë për transportin e grave në hotele dhe rezidenca. Shpërblimi i tyre në Greqi fillonte nga 100 euro në orë, ndërsa në Francë dhe Gjermani nga 150 deri në 200 euro.
Më 23 prill 2016 në një operacion të madh u kapën 17 anëtarë të bandës, duke përfshirë liderin, ndërsa 13 anëtarë të tjerë janë identifikuar dhe kontrolluar. Policia konfiskoi 11 makina, 16 kompjutera, 142 telefona celular dhe 3.240 euro.
