Guardia di Financa e qytezës San Salvo pranë Chiettit ka arrestuar më 27 mars një shtetas shqiptar, që udhëtonte me 3 kg heroinë të pastër. Mediat italiane raportojnë se personi që dyshohet se është vetëm korrier, është i moshës 40 vjeç dhe quhet Aruan Mellushi, i papunë dhe pa precedentë penalë.
Dyshohet se sasia e lëndës narkotike që kushton rreth 60 mijë euro, ishte destinuar të përfundonte në tregun e qyteteve italiane në brigjet e Ardiatikut. Përpara trupit gjykues avokatja e tij ka thënë se shqiptari nuk do të flasë, por sipas autoriteteve ai do t’i nënshtrohet një hetimi të thellë teksa do të qëndrojë në burg.
Hetime të mëparshme kanë bërë që Prokuroria e kësaj zone të Italisë ta përkufizojë si autostradë droge aksin Tiranë – Vasto, një qytet pranë Chietti në krahinën e Abruzzos.
Një vit më parë në këtë zonë policia vendase, strukturat antimafia në bashkëpunim me policinë shqiptare, shkatërruan një bandë e gjerë kriminale të trafikut të narkotikëve.
Pas hetimeve rezultoi se banda ishte e drejtuar nga shqiptarë dhe e strukturuar me celula me detyra të përcaktuara, të cilat nuk kishin njohje me njëra-tjetrën.
Tv Klan
