Autoritetet italiane kanë goditur një tjetër rast të trafikut të drogës nga Shqipëria drejt Italisë.
Mësohet se është kapur një gomone me 1.5 ton kanabis sativa dhe janë arrestuar dy skafistë shqiptarë.
Ata janë me inciale V.L, 31-vjeç dhe T.N, 26-vjeç.
Gomonia ishte 10 metra e gjatë dhe kishte dy motorë të fuqishëm.
Hetuesit italinë treguan se lënda narkotike ishte e ndarë në 64 pako.
Ata mendojnë se nëse kjo sasi droge do të shitej me pakicë, do të kapte një vlerë prej 15 milion euro.
Me të kuptuar se po ndiqeshin nga Guarda di Finanza, skafistët shqiptarë tentuan të arratiseshin në det të hapur, duke shtuar në maksimum shpejtësinë e gomones, pavarësisht se tentativa e tyre për t’u arratisur dështoi.
Duke e parë se nuk kishin asnjë shans për të humbur gjurmët, ata u dorëzuan. Referuar mediave italiane, për goditjen e këtij rasti të trafikut të drogës, pati një bashkëpunim mes autoriteteve italiane dhe policisë shqiptare në Durrës.
Risjellim në kujtesë se dy ditë më parë, u shënua një tjetër rast në Itali, në zonën e Ferraras, policia italiane kapi 2 ton kanabis që po transportohej me dy furgonë, ku dhe u arrestua një 19-vjeçar nga Vlora.
