Policia e Janinës, ka sekuestruar 1 ton drogë që vinte nga Shqipëria. Ndërsa katër shtetas grekë janë arrestuar në afërsi të Janinës, dy prej të cilëve kishin në automjetin e tyre një sasi të madhe droge.
Në orët e para të mëngjesit të sotëm, policia ka ndaluar automjetin e drejtuar nga dy të rinj, një djalë e një vajzë të moshës 20 dhe 17 vjeç. Policia ka dyshuar pasi vendi ku u bë ndalimi ishte në afërsi të kufirit me Shqipërinë.
Në automjet janë gjetur 132 kg kanabis, të ambalazhuar në 96 paketa. Një patrullë policie ka ndaluar edhe një automjet tjetër, që shërbente si pararojë e çiftit që transportonte drogën. Edhe drejtuesi e pasagjeri i automjetit të dytë janë arrestuar.
Nga hetimet e deritanishme rezulton se automjeti ishte vjedhur në Athinë. Sipas shifrave zyrtare, në më shumë se 20 raste të proceduara nga autoritetet policore të Janinës, janë sekuestruar që nga fillimi i vitit më shumë se 1 ton drogë, kryesisht kanabis.
