Seanca plenare e kësaj të hëne është shoqëruar me përplasje të forta mes deputetëve të Partisë Demokratike dhe efektivëve të Gardës, ku pati dhe një tentativë për zjarrvënie, nga ana e deputetit demokrat Flamur Noka. Po ashtu gjatë seancës deputeti demokrat ndezi edhe flakadanë.
Në përfundim të seancës bëhet me dije se në sallën e parlamentit, e cilësuar si “vendngjarje” kanë shkuar agjentët e Byrosë Kombëtare të Hetimit.
Këta të fundit kanë nisur mbledhjen e provave.
Ashtu sikurse ka ndodhur dhe gjatë seancave të kaluara, deputetët e PD bllokuan me karrige foltoren e Kuvendit.
Më pas nga kamerat u kap se deputeti Flamur Noka tenton t’i vëjë zjarrin karrigeve të Kuvendit, pasi u shfaq teksa ndez disa fleta dhe i vendos poshtë grumbullit me karrige. U desh ndërhyrja e Gardës që situata të mos agravonte.
Kryetarja e Kuvendit Lindita Nikolla përjashtoi deputetin demokrat dhe mbylli seancën pas vetëm 17 minutash.
