Agjencia e OKB-së për refugjatët palestinezë ka bërë të ditur se mijëra njerëz hynë me forcë në magazinat e saj të ndihmave në Gaza për të marrë ushqime dhe artikuj të tjerë bazë si produkte higjiene. Thomas Ëhite, drejtori i agjencisë në Gaza, u shpreh se sulmi ishte një shenjë shqetësuese se rendi civil po fillon të prishet.
“Kjo është një shenjë shqetësuese se rendi civil ka filluar të prishet pas tre javësh lufte dhe një rrethimi të ngushtë në Gaza. Njerëzit janë të frikësuar, të frustruar dhe të dëshpëruar. Tensionet dhe frika po përkeqësohen”, thuhet në deklaratën e agjencisë së OKB-së për refugjatët palestinezë.
Mjekët në Gaza kanë deklaruar se ndërsa ofensiva vazhdon situata mund të jetë edhe më katastrofike. Të paktën 30 spitale dhe qendra shëndetësore janë mbyllur në Gaza pasi kanë mbetur pa furnizime mjekësore dhe karburant.
Komunikimet në Gaza u rivendosën pjesërisht këtë të diel, pas dy ditësh shkëputje, që shkaktuan probleme gjerësisht për personat që ndodhen në ato territore. Linjat e komunikimit njoftuan se shërbimet fikse, telefonike dhe lidhja e internetit po riktheheshin gradualisht, pavarësisht se gjendja në terren mbetet serioze pas shkëputjes së 2.3 milionë banorëve me komunikimin me botën e jashtme.
