I kanë marrë çelësat që në muajin Qershor, por ende nuk kanë hyrë në apartamentet e reja.
Ndërtimi i pallateve pas tërmetit ka përfunduar dhe familjet ende nuk janë futur brenda tyre.
Ndaj dhjetëra banorë në qytetin e Durrësit kanë protestuar para bashkisë duke kërkuar që të ndërhyjë në mënyrë që të përfundojë e gjithë infrastruktura.
“Pallati ka mbaru infrastruktura tani lë për të dëshiruar sepse nuk janë bërë as kanalizimet, as ujrat e zeza as elektriku të cilat presin dhe nuk e di pse në këtë vakum pse nuk bëhen.”
“Po vjen viti i ri dhe ishim mprehur që të hyjmë në shtëpitë tona dhe ne po rrimë rrugëve. Atje gjithçka ka mbaruar vetëm për një burokraci, a të ujësjellësit, të OSHEE, apo të Bashkisë Durrës nuk po marrim zgjidhje.”
Janë rreth 135 familje që momentalisht qëndrojnë në shtëpi me qira dhe banorët thonë se e kanë të pamundur që ta paguajnë atë.
“Me 6 kalamaj po rri rrugëve. Më ka nxjerrë e zonja shtëpisë jashtë se nuk kam për t’i dhënë qiranë.”
“Ne miliona Lekë po paguajmë qiranë. Ne s’i përballojmë dot tani.”
“Të na lidhin drita, ujë dhe sa më shpejtë sepse qiraja është shumë e shtrenjtë dhe ne nuk arrijmë dot t’i paguajmë.”
“Nuk e përballojmë dot më. Tani durimi ka mbaruar. Kemi duruar jashtë mase.”
Pallatet e rindërtuara pas tërmetit ndodhen në lagjen nr 17 të qytetit bregdetar.
Klan News
