Olsian Çela, prokuror i Prokurorisë së Krimeve të Rënda, si dhe kandidat për postin e Prokurorit të Përgjithshëm, i është nënshtruar sot procesit të rivlerësimit në Komisionin e Pavarur të Kualifikimit.
KPK nuk ka gjetur shkelje në deklarimin e pasurisë së Çelës, i cili duket se ka burime të ligjshme dhe nuk ka konflikt interesi. Prokurori rezulton se ka qenë pronar i një apartamenti 77 m2 në zonën e “Don Bosko”-s, blerë për 78 mijë euro në vitin 2015, të cilin e ka shitur në vitin 2018 për 85800 euro.
Gjithashtu nuk është konstatuar asnjë problematik me burimet e deklaruara nga mamaja e Çelës, e cila ka pasur mundësi të realizojë kursimet e deklaruara, nga të ardhurat që ka përfituar ndër vite, ndërsa pa probleme kanë rezultuar edhe dy hua të marra nga Çela, tek tezja e tij si dhe tek një person tjetër.
Për sa i përket figurës, DSIK ka realizuar një raport pozitiv. Çela nuk ka kontakte të papërshtatshme me elemente të krimit të organizuar dhe konfirmohet si i përshtatshëm për vijimin e detyrës.
Këshillit i Lartë i Prokurorisë e ka vlerësuar pozitivisht nga ana profesionale, pasi nga 5 dosjet e përzgjedhura me short, në 4 prej tyre nuk ka asnjë problematikë, ndërsa për dosjen tjetër iu ka kërkuar shpjegime për mosfillimin e procedimit penal, pasi duket se nuk janë kryer të gjitha veprimet e nevojshme hetimore./Opinion.al
