Kreu i Partisë Demokratike, Sali Berisha ka dalë sot në një konferencë për media, teksa ka folur sërish për zgjedhjet e 11 Majit.
Gjatë fjalës së tij, Berisha ka komentuar edhe kërkesat e bëra nga kandidatët për deputetë të listës së hapur, për rinumërimin e votave të zgjedhjeve të 11 majit.
Kryedemokrati thotë se kandidatët janë të lirë të bëjnë transparencë, pasi thekson se PD nuk ka dy standarte si Edi Rama.
“Farsë elektorale nuk flas unë, është realitet i pamohueshëm. Kjo që thoni ju, 2,3,4,5 verifikime, parregullsi, këto nuk hedhin asgjë poshtë, as në këto që themi. Përkundrazi. Për sa u përket kandidatëve nuk e di sa kanë kërkuar rinumërimin apo procedurën, por cilido që dëshiron është i lirë ta bëjë transparencë.
Nëse ka pasur njerëz të pandërgjegjshëm ata do identifikohen dhe do mbahet qëndrim ligjor.
Ne nuk kemi dy standarde. Nuk kemi standardin e Edi Ramës që ndalon transparencën, atë se bëjmë kurrë ne. Nuk e di sa janë. Kam përsërit udhëzimet, çdo kandidat qe kërkon transparencë, duhet ta mbështesim”, tha Berisha.
