Ish-ministrja e Drejtësisë në Kanada ka akuzuar se nga zyra e kryeministrit Justin Trudeau kanë ardhur vazhdimisht “presione të rënda dhe të vazhdueshme” për të shmangur një proces të gjatë gjyqësor për shoqërinë Snc-Lavalin, e përfshirë në një skandal korrupsioni në Libi.
Sipas raportimit që bën “Globe and Mail”, gazetë e Torontos, ish-ministrja e Drejtëisë Judy Wilson-Raybould ka thënë se pikërisht për këtë shkak ajo u shkarkua nga kjo detyrë dhe u “degdis” për të drejtuar Ministrinë e Veteranëve, post nga i cili hoqi dorë në 12 shkurt.
Kjo është një goditje e rëndë për kryeministrin popullor Trudeau, në një kohë kur e ndajnë më pak se shtatë muaj nga zgjedhjet e përgjithshme. Ndërkohë, lideri i opozitës Andrew Scheer ka kërkuar që kryeministri të japë dorëheqjen.
Sipas dëshmisë që zgjati më shumë se tre orë, ish-ministrja tha se i janë bërë dhjetë telefonata nga zyra e kryeministrit Trudeau me qëllim që ajo vetë të ndërhynte në sistemin gjyqësor për të ndihmuar kompaninë e madhe të ndërtimit Snc-Lavalin, nga vështirësitë ligjore “Në gjykimin tim, këto ndërhyrje përbëjnë një presion të papërshtatshëm”, ka thënë ajo./Opinion.al
