Prokuroria zgjeron rrjetin e të dyshuarve për kalimin e 8 tonëve hashash drejt Italisë. Burimet thonë se dyshohet se droga ka kaluar në Maqedoni ku është paketuar dhe më pas është nisur transit nga Shqipëria drejt Italisë, ku edhe është bllokuar.
Për këtë fakt janë arrestuar 4 efektivë policie dhe shumë të tjerë janë në hetim, mes tyre edhe biznesmen shqiptar e maqedonas.
Prokuroria për krime të rënda zbardh detaje të operacionit të arrestimit të 4 efektivëve të policisë në pikën e kalimit kufitar të Qafë –Thanës, të dyshuar si pjesë e një rrjeti të trafikut të drogës. ABC News ka mësuar se prokuroria, krahas arrestimit të 4 policëve, ka zgjeruar hetimet edhe ndaj disa biznesmenëve shqiptar dhe maqedonas si dhe punonjës dogane në pikat e kalimit kufitar të Qafë Thanë dhe portit të Durrësit. Burimet thonë se kalimi me lehtësi i 8 tonëve hashash në dy pikat e kontrollit kufitar shqiptar, është bërë në bashkëpunim dhe me dijeni edhe të personave të tjerë.
Sipas akuzës, dyshohet se hashashi është dërguar nga Shqipëria në Maqedoni në rrugë të ndryshme, ku është paketuar në një nga magazinat e ngritura enkas për këtë punë shumë pranë kufirit me Shqipërinë.
Hashashi, thonë burimet, është paketuar në qese disa kilogramshe së bashku me pluhur gipsi për të evituar edhe aromën e lëndës narkotike nga qent antidrug. Më pas, kamioni është nisur për në Shqipëri, ku në pikën e kalimit kufitar të Qafë thanës 4 efektivët e policisë kanë bërë gjithçka fiktive.
Ata kanë përpiluar dokumentet sikur kamioni ka hyrë në skaner, është bërë kontrolli fizik i ngarkesës, i dokumenteve shoqëruese, është plumbosur dhe vulosur për transit në Shqipëri me destinacion italin.
Hetuesit, thonë se i çuditshëm është fakti pasi kamioni me shoferin maqedonas nuk rezulton i regjistruar në hyrje të territorit shqiptar por vetëm në dalje. Sipas prokurorisë, edhe në portin e Durrësit mbrëmjen e 5 shkurtit të këtij viti kamioni i mbushur me 8 ton hashash nuk I është nënshtruar kontrollit, duke u mbingarkuar në target i pashqetësuar.
Kamioni me shoferin maqedonas ka udhëtuar me linjën Durrës-Ankona dhe kishte destinacion final Belgjikën.
Me të zbritur në Ankona, thonë burimet e prokurorisë, policia italiane ka dyshuar për ngarkesën e kamionit dhe i është vënë nga pas. Shoferi, pasi ka konstatuar se po ndiqej nga policia, është ndaluar në një parking dhe ka tentuar të shkëpus karrocierin e kamionit për t’u larguar kur ka ndërhyrë policia duke arrestuar shoferin dhe gjet ngarkesën e drogës të fshehur brenda qeseve me pluhur gipsi.
Sipas prokurorisë, 4 punonjësit e policisë të arrestuar me vendim gjykate, Çlirim Pepa, Ervin Kodra, Lirim Halili dhe Syrja Terziu ishin me detyrë në pikën e kontrollit kufitar të Qafë thanës që kanë lejuar kalimin e 8 tonëve hashash. Ata akuzohen për “trafik droge” në bashkëpunim në kuadër të grupit të strukturuar kriminal.
Burimi: Panorama
