Një sherr mes disa personave është regjistruar mbrëmjen e djeshme në Kamëz.
Policia bën me dije se pas njoftimit të marrë për një konflikt të ndodhur në Rrugën Skënderbeu, Kamëz, kanë organizuar punën dhe kanë finalizuar operacionin policor të koduar “The dispute”.
Në kuadër të këtij operacioni u arrestua shtetasi E. P., 35 vjeç, banues në rrugën “Pandeli Sotiri”.
Ndërsa janë proceduar në gjendje të lirë shtetasit D. P., 24 vjeç., S. P., 23 vjeç, dhe E. L., 33 vjeçe, të tre banues në Kamëz.
Gjithashtu po punohet për kapjen e shtetasve G. L., 29 vjeç, dhe N. R., 24 vjeç, të dy banues në Kamëz.
Këta shtetas, mbrëmjen e djeshme, në Kamëz, për motive të dobëta, janë konfliktuar me njëri-tjetrin me sende të forta. Gjatë konfliktit shtetasi G. L., ka tentuar të përdorë armë zjarri, të cilën ia ka marrë shtetasi E. P., dhe është larguar, duke penguar zbulimin e së vërtetës.
Në cilësinë e provës materiale u sekuestrua arma zjarrit pistoletë dhe municion luftarak. Vijon puna për kapjen e shtetasve G. L., dhe N. R.
Materialet i kaluan Prokurorisë, për veprime të mëtejshme procedurale./Opinion.al
