Hajri Kadriu, një banor në Kamëz denoncon në “Stop”, se bashkia po ndërton një rrugë në pronën e tij që e disponon me çertifikatë. Firma ndërtuese nisi punimet dhe i dëmtoi pjesë të shtëpisë. Në ballafaqimin me ndërtuesin Astrit Kukeli, ky i fundit e godet Hajriun me gurë në fytyrë, ndërsa punëtorët e tij vijuan ta sulmojnë me lopata.
Kukeli thotë, se nëse e ka goditur Hajriun, nuk pa problem, pasi e ka nga anët e veta?! Në komisariatin e Kamzës thonë që cështja ka vajtur në prokurori. Ndërsa në bashki, drejtori i Urbanistikës Arbër Tola dhe specialisti i projekteve Hajredin Murgu, thonë se nuk janë njohur me rastin, por do ta bëjnë procedurën e shpronësimit, që të hënën…?!
Hajri Kadriu: Quhem Hajri Kadriu banues në Kamëz edhe ju drejtova emisionit Stop për një padrejtësi që më është bërë në Kamëz aty ku banoj. Thjesht me një projekt të Bashkisë pa asnjë shpronësim që kjo pjesë e rrugës është pronë e imja e blerë me para me çertifikatë pronësie. Firma ndërtuese me drejtues Astrit Kukelin filloi ndërtimet edhe në pjesën e shtëpisë, i kanë shkulur të gjitha me eskavator. Përveç gjithë këtyre dëmtimeve, thyenë edhe gardhin, e gjithë kjo ishte e tepërt. Fillimisht u ankova dhe thanë na fal, bëmë gabim. Ok, vazhdoi prapë e dyta, e treta me pllakat me shtyllat me rrethimin sipër. Pastaj filloi debati verbal dhe si përfundim më ofendoi edhe me fjalë të tjera. Grumbulloi gjithë punëtorët e firmës me lopata, edhe i pari më gjuajti me gurë në surrat. Astriti më ka dëmtuar në kokë me lopatë, te hunda kam dy kapëse edhe te syri. Kam raport mjeko-ligjor që vërteton dëmtimet fizike.
Ndërkohë, gazetarët e Stop biseduan me ndërtuesin e firmës, i cili u ballafaqua me qytetarin Hajri Kadriu që u dhunua.
