Mediat e SHBA-së, përfshirë CNN, si dhe ato ruse dhe ukrainase kanë raportuar për një telefonatë mes presidentit Donald Trump dhe homologut të tij rus Vladimir Putin për të negociuar përfundimin e luftës.
Ndërkohë edhe vetë Trump në një intervistë ekskluzive dhënë për New York Post në bordin e Air Force tha se beson se Putin “e shqetëson” vdekja e ushtarëve në fushën e betejës.
“Ai nuk dëshiron t’i shohë njerëzit e tij të vdesin. Por njerëz të rinj e të bukur kanë vdekur. Ata janë si fëmijët tuaj, dy milionë prej tyre dhe pa asnjë arsye” tha Trump.
“Lufta nuk do të kishte ndodhur kurrë nëse do të kisha qenë president, unë kam pasur gjithmonë një marrëdhënie të mirë me Putinin”, shtoi ai.
Kreu i Shtëpisë së Bardhë më pas siguroi se ai kishte një plan për t’i dhënë fund konfliktit.
“Shpresoj që të jetë shpejt. Çdo ditë njerëzit po vdesin. Kjo luftë është kaq e shëmtuar në Ukrainë. Unë dua t’i jap fund kësaj gjëje të mallkuar”, tha Trump për New York Post.
Megjithatë, ai nuk iu përgjigj pyetjes së gazetarit se sa herë kishte folur me Putinin në kohët e fundit, duke thënë vetëm “më mirë të mos them”.
“Le t’i fillojmë këto takime. Ata duan të takohen”, thuhet se tha Trump, duke iu drejtuar këshilltarit të sigurisë kombëtare, Mike Waltz, i cili ishte me të në bord të Air Force One.
Ndërkohë nga ana tjetër presidenti Volodymyr Zelensky është shprehur në rrjetet sociale se sipas tij Putin nuk përgatitet për negociata, por për vazhdimin e luftës në Ukrainë.
“Raportet e inteligjencës konfirmojnë se Rusia po krijon divizione të reja dhe po zhvillon objekte të reja të prodhimit ushtarak. Bashkëpunimi me Korenë e Veriut do të vazhdojë të zgjerohet. Moska po përhap gjithashtu teknologji moderne të luftës në rajon, veçanërisht teknologjitë e dronëve.
Kjo do të thotë që Putini nuk po përgatitet për negociata, jo për paqe, por për vazhdimin e luftës dhe jo vetëm kundër Ukrainës. Tani ata po zgjerojnë ushtrinë e tyre me më shumë se njëqind mijë ushtarë. Të gjithë partnerët duhet të jenë të vetëdijshëm për këtë dhe ta shohin qartë”, shkroi lideri ukrainas në X.
