Partia “Mundësia”, një parti e themeluar nga Agron Shehaj pak muaj më parë ka nisur takimet intensive me qytetarë në qytete të ndryshme në kuadër të zgjedhjeve të 11 Majit.
Për emisionin “Opinion” në Tv Klan, Shehaj tregon më shumë mbi aktivitetin e partisë “Mundësia”. Kreu i kësaj partie shprehet se mesazhi i tyre është eksperienca dhe fakti që kanë zgjedhur t’ja dalin me punë të ndershme.
“Aktiviteti ynë ose i imi të paktën nuk ndryshon shumë nga të qenit kandidat për deputet, pasi ajo që bëjmë është që të jemi tek njerëzit, të flasim me njerëzit, të përcjellim mesazhin tonë. Mesazhi jonë është eksperienca jonë. Ne jemi të gjithë njerëz që kemi zgjedhur t’ja dalim me punë të ndershme, pa lidhje politike, pa favore, pa ndere dhe shkojmë tek njerëzit që kanë zgjedhur pikërisht këtë gjë”,thekson Shehaj.
Po ashtu, Shehaj thekson se gjithmonë ka besuar tek të rinjtë që në fillimet e tij si në biznes edhe tashmë në politikë.
“Unë kam besuar tek të rinjtë dhe besoj se të rinjtë janë e vetmja zgjidhje në fakt. Kur kam krjuar kompanitë e mia kam punuar vetëm me të rinjtë. Unë isha 28 vjeç kur kam filluar dhe të gjithë bashkëpunëtorët e mi ishin më të rinj se unë. Unë besoj shumë tek të rinjtë. Më mirë një i ri që ka energji dhe është i motivuar se sa një i madh që ka eksperincën dhe nuk ka më dëshirë”, deklaron kreu i Partisë Mundësia.
Agron Shehaj është ndalur edhe tek fushata e tyre, teksa shton se ajo që ata i drejton është se ata duhet të bëjnë gjera ndryshe nga partitë e tjera.
“Fushata është të kesh një propozim zgjidhjesh, një vizion dhe kjo pastaj duhet të gjesh mënyrën ta përcjellësh dhe kjo nuk është e lehtë sepse duhet të gjesh një mënyrë interesante që të tërheqësh vëmendjen. Ajo që ne na drejton është që e para duhet të bëjmë gjëra ndryshe dhe e dyta ne drejtohemi nga rezultati. Duhet të tregosh se ti ke një plan, një vizion dhe zgjidhje për të ofruar. Fushata elektorale është për të folur për të ardhmen dhe jo për të kaluarën”, tha Shehaj.
Ndër të tjera, Shehaj thotë se partia e tij është një model krejt ndryshe në politikë dhe konsiston në një projekt afatgjatë.
“Ne ndryshojmë totalisht me të gjitha partitë e tjera politike. Ne jemi të vetmit që themi, ne do të zvogëlojmë administratën, do të luftojmë shpërdorimin e parave dhe pasi të kursejmë të paktën 1 miliardë Euro në ato 8 miliardë, 500 milion do jua kthejmë qytetarëve duke iu ulur taksat dhe 500 milion do t’i investojmë në shëndetësi, arsim dhe fusha të tjera”, shprehet Shehaj.
Shehaj po ashtu shprehet i bindur se një ditë do të krijojnë një grup parlamentar dhe do të marrin besimin e qytetarëve për të qeverisur.
