Viti 2023 ka shënuar momente të rëndësishme për emisionin “Stop” në Tv Klan.
Rastet e trajtuara, hetimet, denoncimet që kanë ekspozuar të fshehtat dhe padrejtësitë e qytetarëve.
Gazetarja e emisionit, Odeta Gjevori evidenton në “Shije Shtëpie” dy prej rasteve të bujshme, heqja e licencës së noteres Majlinda Lleshi dhe më pas dënimi i saj me 1 vit burg si dhe dhuna e edukatores ndaj 3-vjeçares në kopshtin “Stinët”.
Odeta Gjevori: Ka startuar me dhunën, domethënë kamera e fshehtë më pikante që është evidentuar në Stop dhe është në memorien e të gjithë njerëzve ka qenë dhuna që ka përdorur në kopshtin “Diren”, ndërkohë “Stinët” ishte një “deja vu” por ishte shumë e rëndë sepse këtu ishte tamam investigim sepse “Stop”-i doli 100 hapa përpara policisë sepse zbuloi në këtë rast kamerat e brendshme të një institucioni publik, që ta themi, shumica i fshinë. Kjo ishte vërtet një sukses për emisionin “Stop” dhe normalisht ne jemi të gjithë njerëz, të gjithë familjarë, na ka irrituar sikur të ishte fëmija jonë sepse edhe ata që s’kanë fëmijë e kanë thënë një sharje kështu në dhëmbë, “ah sikur të isha unë…”
Gazetarja shprehet se periudha e fundvitit i gjen të gjithë të qetë, ndryshe nga adrenalina që vërshon gjithnjë në venat e stafit. Madje ajo shton se nga kjo e fundit ka patur efekt edhe në shëndetin e saj.
Odeta Gjevori: Unë personalisht, nga dinamika e programit kam bërë tre eko zemre. Deshifroje vetë.
Katerina Trungu: Vërtet? Pse?
Odeta Gjevori: Nga dinamika, personalisht, nga dinamika e programit, axhitimi e shumë gjëra, kam bërë tre eko zemre sepse gjatë gjithë kohës kemi adrenalinë, nga një situatë te tjetra dhe kjo transmeton energji.
Sa i përket rasteve që vijnë në emisionin investigativ, Gjevori tashmë ia ka marrë dorën aksionit dhe janë pika e fortë e saj.
Odeta Gjevori: Unë personalisht jam shumë emotive, përfshihem, madje me shaka, sportivitet kur më caktohet ndonjë temë se nuk e kemi luksin që t’i zgjedhim vetë temat, por na i cakton redaksia dhe në momentin që na caktohet një temë, keni parë që unë kam fituar imunitet me ato temat aksion. I them të lutem Saimir, më jep tema aksion, tema polici sepse e kam më të lehtë gjuhën e komunikimit. Po më dhe këto rastet shëndetësore, aty bëhem petë./tvklan
