Kryeministri i Greqisë, Kyriakos Mitsotakis në një konferencë me gazetarët ka folur për raportet me Shqipërinë, duke thënë se duan që të kenë marrëdhënie sa më të mira me vendin tonë.
Gjatë konferencës për shtyp të kryeministrit Kyriakos Mitsotakis, në Panairin Ndërkombëtar të Selanikut, ai u pyet për marrëdhëniet e tij me kryeministrin shqiptar Edi Rama pas tensionit të krijuar nga qëndrimi i palës shqiptare për temën e Fredi Belerit, i cili u lirua nga burgu disa ditë më parë.
Mitsotakis theksoi se duan marrëdhënie sa më të mirë me të gjithë fqinjët.
”Kemi kaluar një kohë të vështirë dhe nuk dua të flas në detaje për rastin Fredi Beleri, i cili i dha fund një aventure krejtësisht të padrejtë dhe të panevojshme. Dua të them se marrëdhëniet midis Greqisë dhe Shqipërisë kalojnë përmes respektimit të të drejtave të pakicës sonë etnike të Shqipërisë dhe çështjes së të drejtave pronësore të grekëve.
Kjo çështje do të rikthehet edhe në Parlamentin Europian me punën e eurodeputetit dhe do të sigurojmë që të drejtat pronësore të bashkatdhetarëve tanë të respektohen plotësisht në mënyrë që Shqipëria të ecë përpara në rrugën e saj europiane”, tha Mitsotakis.
