Prokuroria e Përgjithshme ka nisur hetimet për kallëzimin e Ministrisë së Energjisë dhe Industrisë, Damian Gjiknuri, ndaj ish-ministrave të qeverisë së kaluar për privatizimin e Operatorit të Sistemit të Shpërndarjes së Energjisë në vitin 2009.
ABC News ka mësuar se kallëzimi ka kaluar në zyrën e Drejtorisë së Hetimit Financiar dhe Antikorrupsionit pranë institucionit qendror të akuzës, i cili ka urdhëruar verifikimin e pretendimeve të kallëzuesit.
Burimet thonë se janë caktuar dy prokurorë për hetimin e çështjes, të cilëve u janë ndarë disa detyra për të hetuar pretendimet e ngritura në kallëzim. Me nisjen e këtij veprimi hetimor, prokuroria thotë se ka administruar në dosje raportin voluminoz të auditit të inspektorëve të Ministrisë së Energjisë dhe Industrisë, të cilët kanë konstatuar shkeljet e renditura në 8 pikat e kallëzimit.
Referuar materialit të dorëzuar në prokurorët thonë se do të verifikohet i gjithë procesi i privatizimit të OSSHE, duke filluar që nga përgatitja për privatizim, hartimi i kuadrit ligjor përkatës, ndjekja dhe zbatimi i procedurave të privatizimit.
Do të kërkohet në bazë të auditit të verifikohet procesi i tenderimit, materialet e negocimit të kontratës, konkluzionet e përmbylljes së procesit të privatizimit dhe zbatimi i kontratës së privatizimit. Gjithashtu hetuesit thanë, se do të kontrollohen veprimet dhe mosveprimet e institucioneve përkatëse gjatë zbatimit të kontratës, shkresat e Qeverisë pasi në kallëzim dyshohet se ka ndërhyrë në vendimarrjen e institucioneve të pavarura si Enti rregullator I Energjisë.
Si dhe do të verifikohen procedurat që kanë ndjekur institucionet e shtetit shqiptar pas heqjes së licencës së shoqërisë çeke CEZ Shpërndarje. Në përfundim të këtij verifikimi, thanë hetuesit do të vendoset nëse ka elementë të veprës penale të konsumuar nga të kallëzuarit, që dyshohet se me veprimet dhe mos veprimet e tyre i kanë sjellë shtetit shqiptar një dëm prej rreth 414 milion euro. Për këtë dëm financiar, Ministria e Energjitikës dhe Industrisë ka denoncuar ish-ministrat e këtij dikasteri Genc Ruli dhe Florian Mima dhe dy zv/ministrat e tyre Neritan Alibali dhe Enno Bozdo. Në kallëzim pretendohet se ka kryer shkelje ligjore edhe ish-drejtoresha e Përgjithshme e Shërbimeve Tregtare, Mimoza Vokshi, shtetasja Suzana Guxholli si ish-këshilltare e kryeministrit Sali Berisha dhe ish-ministri i Financave, Ridvan Bode.
Veprimtaria e të gjithë këtyre personave të kallëzuar dhe anëtarëve të Komisionit të Vlerësimit të Ofertave dhe personat e tjerë që janë marrë me këto procedura, sipas prokurorisë do të hetohen për akuzën e “Shpërdorimit të detyrës”.
Ministria e Energjitikës dhe Industrisë, në kallëzimin e saj, pretendon se audituesit kanë konstatuar se privatizimi i OSSHE-së ka qenë një proces abuziv, i parakohshëm, në kundërshtim të hapur me aktet nënligjore, praktikat e privatizimit në sektorin energjetik si dhe janë konstatuar elementë të veprës penale të shkeljes së barazisë në tendera.
