Numri i viktimave nga zjarri masiv në Kaliforni ka arritur në 44. Ky zjarr është më vdekjeprurësi në historinë e zjarreve të rëna në Kaliforni.
Mijëra zjarrfikës janë përpjekur të mbajnë nën kontroll të ashtuquajturin “Camp Fire” në pyjet e zonës malore Sierra Nevada, në veri të Sacramentos. Ekipet e kërkim-shpëtimit kanë pasur një mision të zymtë, atë të rikuperimit të trupave të pajetë.
“Deri më sot që flasim, edhe 13 trupa të tjerë të pajetë janë rikuperuar. Duke e çuar numrin e përgjithshëm të viktimave në 44”, tha sherifi i zonës, Kory Honea në një konferencë për shtyp.
“Zjarri është më vdekjeprurësi i rënë në historinë e Kalifornisë”, shtoi më tej Honea.
Edhe pse është vështirë të jesh i sigurtë, për shkak të mungesës së vazhdimësisë në mbajtjen e shënimeve apo kategorizimit, “Camp Fire” duket se do të konsiderohet si zjarri më vdekjeprurës amerikan në një shekull. Që kur i ashtuquajturi “Cloquet Fire” shkaktoi vdekjen e afro 1.000 personave në Minnesota në vitin 1918.
“Camp Fire” është vatra më e madhe e flakëve të kësaj fatkeqësie. Që detyroi rreth një çerek milioni njerëzish të largohen nga shtëpitë e tyre. “Camp Fire” është gjithashtu edhe më shkatërrimtari se çdo zjarr tjetër në histori. Teksa ka shkrumbuar 6.500 shtëpi në qytezën Paradise, thuajse duke e zhdukur fare atë nga harta.
Më shumë se 5.100 zjarrfikës, që kanë ardhur edhe nga Uashingtoni e Teksasi, po punojnë për frenimin e këtij ferri të pazakontë, ndërsa ekipet e kërkimit të “viktimave në masë” po mbështeten edhe nga antropologë dhe një laborator ADN-je, për të identifikuar mbetjet që po gjenden ngado, shpesh të reduktuara deri në vetëm disa kocka.
Presidenti amerikan Donald Trump “deklaroi se një fatkeqësi madhore ekziston në shtetin e Kalifornisë, ndaj urdhëroi ndihmat federale në mbështetje të shtetit dhe përpjekjet lokale për rimëkëmbje në zonat e prekura nga zjarri”, thuhet në një deklaratë të Shtëpisë së Bardhë.
Lëvizja në fjalë bën të mundur që ndihmat të shkojnë për zonat e goditura më keq. Si kantonet Butte, Los Angeles dhe Ventura.
