Kalaja e Bashtovës, një nga monumentet më të rëndësishme të trashëgimisë kulturore shqiptare, ka hapur dyert për vizitorët pas përfundimit të punimeve restauruese. Monumenti i vendosur në bashkinë Rrogozhinë, tashmë është kthyer në një pikë atraktive për turizmin kulturor dhe natyror.
Me rastin e përurimit, u organizua një festë që beri bashkë kulturën dhe kreativitetin. Ekspozita artizanale, performanca nga DJ kombëtarë dhe një ekspozitë me vizatime të fëmijëve që paraqisnin site arkeologjike nga e gjithë Shqipëria, e kthyen kalanë në një qendër të gjallë të festës.
“Ne duam të ndihmojmë që site si Kalaja e Bashtovës, Kulla Veneciane në Durrës apo Hamami i Kavajës të kontribuojnë në zhvillimin ekonomik lokal dhe të rrisin turizmin në rajon”, tha ambasadori i BE-së në Shqipëri, Silvio Gonzato.
Ky projekt është pjesë e programit të BE-së për kulturën, i cili ka për qëllim rijetëzimin e 21 siteve historike në të gjithë Shqipërinë, duke i kthyer në burime zhvillimi ekonomik dhe social.
“Angazhimi ynë për trashëgiminë kulturore është i fortë. Falënderojmë të gjithë ata që bënë të mundur restaurimin e kësaj kalaje”, tha drejtuesja e UNOPS për Shqipërinë, Sabine Kania.
Kalaja e Bashtovës konsiderohet ideale për organizimin e aktiviteteve në natyrë, duke kombinuar historinë me peizazhin e veçantë që e rrethon.
“BE po i dorëzon Shqipërisë 23 objekte të restauruara. Do të krijojmë një rrjet që artizanët të promovojnë produktet e tyre në site të trashëgimisë kulturore”, tha ministri i Ekonomisë, Kulturës dhe Inovacionit, Blendi Goxhaj.
Falë bashkëpunimit të ngushtë mes Bashkimit Europian, UNOPS-it dhe institucioneve shqiptare, Kalaja e Bashtovës jo vetëm që është shpëtuar nga degradimi, por është transformuar në një qendër të re kulturore dhe turistike për rajonin.
Klan News
