Në Shqipëri, hapja e një “bar-kafeje” është kthyer prej vitesh në një nga mënyrat më të zakonshme të vetëpunësimit, duke tejkaluar disa herë numrin e mjekëve apo policëve në raport me popullsinë.
Por sa kafene kemi sot në vend dhe çfarë tregojnë shifrat më të fundit nga Administrata Tatimore?
“Në çdo lagje, në çdo cep qyteti, një “bar-kafe” e re duket sikur hapet përditë. Vetëm në tre vitet e fundit janë regjistruar mbi 4,600 biznese të reja me këtë aktivitet. Shifra është domethënëse, sidomos po të kemi parasysh se më shumë se 15 mijë kafene janë aktive aktualisht në rang kombëtar.”
Kryeqyteti prin me shtimin e 629 subjekteve të reja të këtij lloji, i ndjekur nga Durrësi, Fieri dhe Elbasani. Të dhënat zyrtare nga Drejtoria e Përgjithshme e Tatimeve konfirmojnë se vetëm Tirana ka më shumë kafene se disa qarqe të marra së bashku.
Në të gjithë vendin, “bar-kafetë” përfitojnë nga një regjim tatimor i lehtësuar, duke paguar 0% tatim mbi të ardhurat për xhiro deri në 14 milionë lekë.
Kafja nuk është më vetëm vend takimi mes miqsh. Sot ajo është bërë një “institucion” i përditshëm ku diskutohen çështje pune, zhvillohen takime profesionale, madje edhe intervista punësimi.
“Megjithëse konkurrenca është e fortë dhe shumë prej tyre mbyllen brenda vitit të parë, sipërmarrja në këtë sektor mbetet një zgjedhje e përhapur. Vetëm në vitin 2024, 1,751 persona u vetëpunësuan përmes hapjes së një bar-kafeje, duke e kthyer këtë sektor në një mikro-biznes tipik për familjet shqiptare.”
Në Shqipëri sot ka më shumë kafene se sa mjekë apo policë. Referuar të dhënave në raport me popullsinë, me 15,348 kafene aktive, vendi ka sot një kafene për çdo 154 banorë. Ndërkohë, në gjithë Shqipërinë janë rreth 6,000 mjekë dhe 11,300 policë, ose më pak se gjysma e numrit të kafeneve.
Ndërsa stina e verës sjell më shumë lëvizje dhe konsum, mbetet për t’u parë nëse ky ritëm i lartë i hapjes së kafeneve do të shoqërohet edhe me qëndrueshmëri në treg./ Tv Klan
