TIRANE- Jamarbër Malltezi, dhëndri i Sali Berishës dhe njëkohësisht sekretari për Mjedisin në PD i është përgjigjur disa akuzave që i janë bërë në gazetën Dita, me pronarë djemtë e deputetes socialiste Arta Dade. Sakaq Malltezi shprehet edhe për ish-ambasadorin amerikan në Tiranë, John Withers, duke thënë se gënjeshtrën e kishte metodë pune.
“Fletushka e Arta & sons (gazeta Dita) qenka prekur keq nga punet e mia ne mbrojtje te mjedisit, ndaj te cilave kam 24 vite qe tregoj vemendje dhe perkushtim. Ne perpjekje per t’u dukur te besueshem ne sajese, i referohet edhe nje ish diplomati amerikan (John Ëithers), që gënjeshtren e kish metode pune”. Kështu shkruan Malltezi në përgjigje të akuzave ndaj tij në gazetë.
Më tej vazhdon ”nuk është e hijshme qe te tallem me ish -diplomatin siç tallet rregullisht një Piktor, por i sugjeroj Artës që nese eshte e interesuar per kete ceshtje t’i kerkoje kunates se saj qendrimin zyrtar te Bankes Boterore, e cila para 6 vitesh kerkoi zyrtarisht ndjese me gojen e Zv. Presidentit te Bankes Boterore per sajesat qe perpiqet te rickloje Piktori”.
Malltezi thotë se do ta vazhdojë misionin e tij për të ndaluar ndërtimin e këndit të lojërave prej betoni tek parku i liqenit artificial. Ai për herë të parë, si një zë nga PD-ja ka përmendur edhe mundësinë e mbajtjes së një referendumi për këtë çështje.
***
Shkrimi i botuar në gazetën Dita për Jamarbër Malltezin
Titulli: Familja Berisha e lidhur me ndërtimet e Bankës Botërore
Dërguar nga Ambasada e Tiranës më 10.02.2009 Merr Departamenti Amerikan i Shtetit
Firmosur: Ambasadori Withers
“Vetëm pesë muaj përpara zgjedhjeve të përgjithshme, një tjetër skandal korrupsioni (përveç atij të Gërdecit, rrugës DurrësKukës dhe marrëveshjeve me biznesmenin hije nga Bosnja, Damir Fazlliç), dobëson edhe më shumë imazhin e Berishës si njeri kundër korrupsionit dhe shton perceptimin publik se kryeministri, familja e tij dhe rrethi i ngushtë po përdorin pushtetin për tu pasuruar.
Në fund të janarit 2009 parlamenti shqiptar dhe shtypi nisën të nakuzonin qeverinë shqiptare dhe veçanërisht dhëndrin e kryeministrit Sali Berisha, Jamarbër Malltezi, për keqpërdorimin e fondeve të projektit të Bankës Botërore për qëllime personale.
BB ndaloi projektin dhe hetoi skandalin në qendër të të cilit ndodhet prishja me dhunë e disa ndërtesave në Jalë në vitin 2007 në kundërshtim me politikat e Bankës Botërore. Paneli i Inspektimit i Bankës Botërore e konsideron çështjen si “një nga hetimet më të vështira që është ndërmarrë këto 14 vitet e fundit”.
Skandali është rreth projektit të BBsë “Për menaxhimin e strukturuar të bregdetit të jugut”, i drejtuar nga dhëndrri i Berishës, Malltezi… Banka Botërore pranoi të financonte projektin pasi mori garanci nga qeveria Berisha se asnjë ndërtesë nuk do të prishej. Por në 26 mars 2007, Malltezi dërgoi një letër tek autoritetet lokale, përfshirë edhe kreun e Policisë Ndërtimore, për tu ankuar mbi “ndërtimet pa leje në bregdetin e jugut”, veçanërisht në Jalë.
Malltezi kërkoi që të merreshin masa sa më shpejt. Më pak se një javë më pas, më 3 prill, policia njoftoi banorët që shtëpitë e tyre do të prisheshin. Atyre iu dha pesë ditë afat për të apeluar vendimin në gjykatat lokale, gjë të cilën ata e bënë, Por përpara se gjykatat të shqyrtonin apelin, buldozerët nisën shkatërrimin e shtëpive, proces i cili përfundoi më 17 prill.
Shpejtësia e implementimit të vendimit për prishjen ishte epaprecedent. Nga ana e tij, Berisha ka akuzuar panelin e hetuesve të BBsë se po hedh baltë dhe po shpif kundër qeverisë shqiptare…
Ne do të vëzhgojmë se sa do të kërkojë të fitojë politikisht opozita nga ky skandal. Zyrtarët e korruptuar dhe shpërdorimi i detyrës janë një çështje e nxehtë për votuesit, por nga ana tjetër është një thikë me dy presa për opozitën për shkak të së kaluarës dhe të tashmes së tyre me marrëveshje të tilla…”
