Presidenti i zgjedhur Donald Trump takon sot disa kandidatë për poste të kabinetit të tij presidencial.
Zoti Trump ndodhet në kompleksin e tij të pushimeve në Bedminster të Nju Xhërsit ku po takohet me dy prej mbrojtësve të tij më të fortë gjatë fushatës, ish-kryetarin e bashkisë së Nju Jorkut Rudy Giuliani dhe Guvernatorin e Nju Xhërsit Chris Christie, raporton Zeri i Amerikës.
Z. Giuliani nuk ka shumë përvojë në politikën e jashtme por ka kërkuar që të emërohet Sekretar Shteti. Ndihmësit e Trumpit thonë se Presidenti i zgjedhur po analizon edhe kandidatura të tjera.
Chris Christie ishte një ndër 15 rivalët që konkuruan me Trumpin për emërimin e Partisë Republikane si kandidat në zgjedhjet presidenciale. Pasi u eliminua nga gara, Christie e mbështeti Donald Trumpin dhe bëri fushatë për të.
Ai ishte për disa kohë edhe kreu i ekipit të tranzicionit për zotin Trump. Por guvernatori i Nju Xhërsit shihet si kandidat me probleme, pasi një numër zyrtarësh të administratës së tij u shpallën fajtorë në një skandal me motive politike në shtetin e Nju Xhërsit.
Po sot, Donald Trump njoftoi përmes Twitterit se po shqyrton mundësinë që të emërojë gjeneralin në pension James Mattis si Sekretar të Mbrojtjes.
