Ministrja e Mbrojtjes, Mimi Kodheli, ka reaguar për herë të parë pas sulmit që i është bërë nga mediat greke, të cilët shkruan se “25 vite më parë ajo ka punuar si balerinë në klubet e natës në Greqi”.
Një shkrim i tillë në mediat greke erdhi pas përplasjes në distancë të dy ministrave të Mbrojtjes të Greqisë dhe Shqipërisë, ku Kodheli në reagimin e saj tha se ka ikur koha “satrapëve” si përgjigje ndaj kërcënimit të homologut grek.
Në përgjigje të këtyre mediave, ministrja Kodheli ka përdorur një thënie të ishKryeministres së Britanisë së Madhe, Margaret Theçer, të cilën e ka postuar në “Facebook”.
“Gjithnjë festoj pa masë nëse një sulm është praktikisht lëndues sepse mendoj, mirë, nëse ata sulmojnë dikë personalisht do të thotë se nuku ka mbetur asnjë argument politik”
Sipas asaj që shkruante faqja “militaire.gr”, Kodheli “para 25 vitesh, ishte një balerinë e bukur që punonte në Syngrou Avenue. Më pas ajo shkoi për studime në SHBA ku kreu doktoratë për Marrëdhënie Ndërkombëtare. Pasi u angazhua në politikë, sot ajo është ministre e Mbrojtjes në shtetin fqinj”.
Në një intervistë për emisionin e mëngjesit “7pa5” në “Vizion Plus”, ministrja Kodheli i është përgjigjur me ironi deklaratave të homologut të saj grek, Kamenos, duke u shprehur se këto nuk duhen marrë shumë seriozisht.
Gjatë kësaj interviste, ministrja ka shprehur edhe mendimin e saj lidhur me koalicionin me LSI. Ndërsa theksoi se marrëdhëniet janë të kënaqshme dhe koalicioni funksionin, ministrja Kodheli shtoi se janë shumë faktorë që do të vendosin për të ardhmen e tij.
Ndërsa rritjen e pagave të ushtarakeve, ministrja e Mbrojtjes e cilësoi si një premtim të mbajtur nga qeveria aktuale.
