Pak ditë më parë, kreu i KED-së Ardian Dvorani mohoi se ai është zyrtari i Gjykatës së Lartë që është takuar me botuesin Henri Çili, për të favorizuar dy të burgosur për vrasjen e efektivit në Lazarat.
Ndërkohë, Partia Demokratike ka reaguar sot duke hedhur akuza ndaj drejtorit të Magjistraturës, Sokol Sadushi.
PD shprehet në reagimin e saj, Sadushi duhet t’i japë fund heshtjes dhe të japë shpjegime publike për pozicionin e tij. Gjithashtu, PD thotë se “Është koha që Sokol Sadushi të flasë, heshtja nuk e ndihmon dot gjatë!”
Reagimi i PD
Ardian Dvorani deklaroi një ditë më parë se nuk është ai personi që prokuroria e identifikon në dosjen penale si drejtues i një organi të lartë të drejtësisë, që ka premtuar favore të paligjshme për një dosje në Gjykatën e Lartë. Në mungesë të zbulimit të emrit nga policia dhe prokuroria, që vazhdojnë të punojnë me dy standarde, Sokol Sadushi duhet t’i japë fund heshtjes dhe të japë shpjegime publike për pozicionin e tij. Sokol Sadushi, i cili udhëhoqi reformën në drejtësi si ekspert i lartë, është drejtor i Shkollës së Magjistraturës, një organ i lartë i sistemit të drejtësisë. Si kandidat pa rival për Gjykatën e Lartë, emërimi i tij pritet të ndodhë në mars, kohë në të cilën, sipas prokurorisë, drejtuesi i lartë i organit të drejtësisë do të kryente takimin e rradhës për favorin e paligjshëm. Është koha që Sokol Sadushi të flasë! Heshtja nuk e ndihmon dot gjatë!/ Opinion.al
