Jaeld Çela, ish-shefi i Policisë së Vlorës vazhdon ti fshihet drejtësisë.
Por kjo nuk e pengon të kërkojë mbylljen e hetimeve nga arratia aty ku ndodhet prej një viti.
I dyshuar si garantues i grupit të Habilajve në trafikun e drogës, Çela ka ankimuar vendimin e Gjykatës së Krimeve të Rënda për të zgjatur me tre muaj hetimet ndaj tij.
Petrit Ismaili, avokat i Jaeld Çelës, thotë se ka kundërshtuar zgjatjen e hetimeve nga ana e prokurorisë.
“Kërkojmë mbylljen e çështjes, pasi nga materialet e vëna në dispozicion nga Prokuroria e Krimeve të Rënda, nuk ka asnjë provë që implikon klientin tim”, tha Ismaili për “BalkanWeb”.
Shqyrtimi i kërkesës së Çelës pritet të mbahet në datën 21 shtator.
Jaerd Çela ka kërkuar disa herë mbylljen e hetimeve.
Në muajin mars të këtij viti Gjykata e Krimeve të Rënda rrëzoi një tjetër kërkesë të Çelës.
