DURRËS- Gazmir Çollaku që u rrëmbye në Durrës dhe më pas u gjet i vrarë në fshatrat e Krujës ishte i fejuar me një vajzë nga Durrësi që punon juriste në Hipotekë. Ajo ka dëshmuar në polici, për të ndihmuar hetimet për zbardhjen e ngjarjes. Theksojmë se deri tani policia nuk ka asnjë autor të dyshuar për ngjarjen.
Sipas të fejuarës, Gazmiri ka pasur shoqëri të zgjeruar, por ajo vetë nuk ka qenë në dijeni të ndonjë konflikti të mundshëm të tij. Sakaq thuhet se vajza e re ka qenë në gjendje të rënduar psikologjike dhe ajo do të merret sërish në pyetje në ditët në vijim.
Ajo ka thënë se bashkëjetonte me Gazmir Çollakun, në një shtëpi të marrë me qira në lagjen nr.6 në Durrës. “Me Gazin jam fejuar disa muaj më parë, duheshim shumë dhe shkonim shumë mirë me njëritjetrin. Ai ishte shumë i dashur dhe shkonte shumë mirë me familjen e tij dhe më të timen. Gjatë verës morëm një shtëpi me qira. Ai ishte njeri miqësor, por nuk më ka folur asnjëherë për problemet e tij”, ka thënë ajo para policisë.
