Pak ditë pasi dorëzoi mandatin si deputet i PS dhe pasi SPAK i komunikoi marrjen si të pandehur për shpërdorim detyre, Jurgis Çyrbja arrestohet, por për një çështje të re. Bashkë me të ka rënë në pranga edhe Ahmet Masha, vëllai i kunatit të ish-deputetit Çyrbja.
Lidhur me arrestimin ish-deputetit të PS, janë bardhur detaje të reja në lidhje me kontaktet që ai kishte me botën e krimit.
Për këtë çështje autoritetet kanë identifikuar dhe shpallur në kërkim Altin Hajrin. Ky i fundit një emër i njohur i botës së krimit. Raportohet se Altin Hajrin ka ndërhyrë që Jurgis Çyrbja të ishte i treti në listën për deputet. Bisedat mes tyre janë zhvilluar në aplikacionin e koduar SkyEcc në vitin 2019.
Në biseda flitet që Jurgis Çyrbja të hynte në listën e sigurtë të PS-së për deputet. Altin Hajri mësohet se ka ndërhyrë për socialistin së bashku me Ahmet Mashën. Gjithashtu në biseda ka dalë edhe emri i shtetasit Edmond Koçi, i njohur edhe si Mond Çekiçi.
Ish-deputeti akuzohet se ka strehuar në banesat dhe pronat e tij të kërkuarin Hajri dhe kjo duket se është zbuluar nga komunikimet në platformën e koduar SKY ECC, që ka shërbyer si provë, bashkë me materiale të tjera të siguruara nga prokurorët.
Policia dhe BKH nuk ekzekutuan dot masën ndaj tij, pasi nuk u gjet gjatë kontrolleve të djeshme (20 tetor). Hajri bëhet kështu personi i tretë i dosjes dhe SPAK pritet të sqarojë detaje të tjera shtesë për pozicionin e tij në çështje dhe lidhjet me ish-deputetin socialist të qarkut Durrës, i cili ishte i treti i listës dhe u zgjodh për mandat në vitin 2017.
Çyrbja akuzohet për tregtim të sekretit shtetëror, përkrahje të autorit të krimit dhe korrupsion zgjedhor, lidhje me grup kriminal dhe komunikime në SKY ECC. Bashkë me të u arrestua mbrëmë edhe Ahmet Masha, një tjetër personazh i njohur për drejtësinë.
Kush është Altin Hajri
Ai akuzohet për rrëmbimin dhe zhdukjen e Jan Prengës në janar të 2020.
Altin Hajri, një nga anëtarët e grupit kriminal që vepronte në zonën e Shijakut po gjykohet ne mungesë pasi nuk është bërë e mundur gjetja e tij.
Gjithashtu ishte shpallur në kërkim ndërkombëtar nga autoritetet italiane, i dyshuar si koka e një rrjeti të trafikut të drogës nga Afganistani në Itali. Por autoritetet italiane pushuan hetimin ndaj tij, duke hequr emrin e tij nga listat e të kërkuarve.
Në Shqipëri, Altin Hajrit iu bllokuan pasuri me vlerë rreth 10 milionë euro.
Në tetor 2015 në një operacion të përbashkët të policisë italiane dhe shqiptare të koduar “Enigma”, u arrestuan 16 persona dhe u sekuestruan më shumë se 450 kilogramë drogë e papërpunuar, 325 kilogramë marijuanë, 206 kilogramë heroinë.
Të dyshuar si pjesë e këtij trafiku, në atë kohë u arrestuan në qytetin e Durrësit edhe djali i xhaxhait të Altin Hajrit, dhe një kushëri tjetër i tij, Hajri Balla dhe Fortuz Hajri, 53 dhe 24 vjeç, të dy banues në Shijak. Arrestimi i tyre u bë në bazë të një urdhri ndalimi të gjykatës së Venecias së datës 15 gusht të vitit 2015.
Ata akuzoheshin në atë kohë për veprën penale të “trafikimit të lëndëve narkotike”, ndërsa i kishin shpëtuar operacionit të policisë në vitin 2015, bashkë me Altin Hajrin.
Rrëmbimi dhe zhdukja e Jan Prengës
Jan Prenga u rrëmbye më 17 Janar 2020 në zonën e Kamzës dhe prej gati 4 vitesh trupi i tij nuk është gjetur ende.
Policia provoi me anë të pamjeve filmike praninë e trupit të tij dhe vendosi pas hekurave Leonard Hajri, Bajram Hajri, Festim Bexhdili, Olsi Turja si dhe Ardian Docaj, ndërsa sot në burg ka mbetur vetëm kopshtari Festim Bexhdili.
Ai u ekzekutua me urdhër nga “kokat” e bandës, për shkak të një sasie prej 283 kg kokainë, që vëllai i Jan Prengës, Astrit mbante peng në Angli dhe nuk e tregonte se ku e kishte çuar.
