23-vjeçari Jurgen Kurti, dyshohet se është përfshirë në vrasjen e babait të tij ditën e djeshme në zonën e ish-Bllokut, por teksa ngjarja është ende e paqartë, nuk dihet nëse ishte ai që i ka dhënë goditjen fatale me thikë Artur Kurtit, apo ishte daja i tij.
Të dy kishin shkuar mbrëmjen e djeshme në shtëpinë e Shpresa Kurtit, Jurgeni tek e ëma dhe Leonard Ristani tek e motra, pasi kjo e fundit i kishte thirrur për ndihmë sepse i shoqi, me të cilin ishte në proces divorci, e kishte dhunuar të shtunën e kaluar.
Në momentin që të dy kanë qenë në banesë, ka hyrë Artur Kurti, me një thikë në dorë, për të provokuar sërish sherr, por ai nuk e dinte se ajo thikë do ishte arma që do i merrte edhe jetën mbrëmjen e së hënës.
Sakaq, 23-vjeçari kishte një jetë të ‘ngjeshur’ mesa duket, pasi ishte administrator i një kompanie në Tiranë. Ndër të tjera, Jurgeni kohët e fundit kishte mundësuar kontaktin dhe sjelljen në Tiranë të reperit amerikan Rick Ross.
Në një foto postuar në profilin e tij në Instagram ai shfaqet me një prej emrave më të famshëm të muzikës hip-hop, i cili kishte mbërritur dje në Tiranë dhe shoqërohej nga Jurgeni.
Reperi amerikan kishte të planifikuar të performonte në një nga klubet e kryeqytetit, këtë të martë. Por edhe pse dje u arrestua personi i cili kishte mundësuar ardhjen e tij në Tiranë, reperi nuk e ka anuluar koncertin sot.
Kjo bëhet me dije në faqen e klubit ku do performojë reperi. Aty është postuar edhe një video ku shihet Jurgen Kurti teksa drejton makinën brenda së cilës ndodhet reperi Rick Ross./Panorama
http://www.dailymotion.com/video/x427yze_jurgen-kurti-me-reperin-amerikan_news
