Presidenti i Komisionit Evropian, Jean-Claude Juncker, u zotua se BE do të godasë çdo “lajm të rremë” gjatë fushatës për zgjedhjet e Parlamentit Evropian, që do të mbahen në maj.
“Nëse qeveritë bëjnë pretendime për Bashkimin Evropian ose Komisionin, të cilat nuk korrespondojnë me të vërtetën, atëherë do të përgjigjemi. Unë tashmë kam parë përpjekje për të ndikuar zgjedhjet e Parlamentit Evropian me manipulime, që vijnë nga disa kënde, jo vetëm jashtë BE-së. Edhe shtetet brenda BE-së po bëjnë përpjekje të drejtojnë vullnetin e elektoratit me lajme të rreme, por ne do t’i luftojmë”, tha Juncker në një intervistë për grupin mediatik Funke të Gjermanisë, duke mos përmendur emra konkretë.
Sipas Juncker, Komisioni “është i përgatitur për t’i luftuar të gjitha”.
Kujtojmë se zgjedhjet për Parlamentin Evropian do të mbahen nga data 23 deri më 26 maj, ndërsa pjesëmarrja në to ka rënë vazhdimisht gjatë viteve të fundit./Opinion.al
