Teksa foli për ligjin special “anti-KÇK” nga foltorja e Kuvendit, kryeministri Rama hodhi akuza se ndaj opozitës, presidentit dhe të gjithë atyre që kanë shprehur kritikat e tyre në lidhje me miratimin e kësaj pakete masash.
Por kryeministri në një pjesë të fjalës së tij e humbi dhe qetësinë duke përdorur një gjuhë tallëse.
“Ju jeni një pjesë shumë e vogël e popullit, e kam me të gjithë ju nga ekrani, jeni komplet pa lidhje. Nuk e ndjeni këtë popull, nuk e ndjeni këtë vend, pasi nuk e dini çfarë do ky popull dhe çfarë do ky vend. Populli i di shumë mirë të ndajë mes atyre që bëjnë më të mirën për të mirën e tyre, duke bërë dhe gabime, dhe atyre që nuk kanë lidhje fare, janë pa lidhje, pa lidhje fare. Ufo quhet në gjuhën angleze, ,unidentified flying object, kështu quhen të gjithë këta të këtij fronti të larmishëm, krijojnë probleme për valët e televizorit, bëjnë scramble në ekranet dixhitale. Çdo lidhje në vendin ku ulen e kanë lidhjen me problemin. Ufo-t e këtushme janë me helikë, ulen në studio dhe fillojnë rrotullohen helikat dhe kur fillojnë të rrotullohen përnjëherë aq sa përgjithësisht moderatorët janë pa flokë”, tha Rama.
Më parë gjatë fjalës së tij Rama tha se opozita, presidenti dhe deri te avokati i popullit janë bërë një koalicion që mbrojnë kriminelët.
“Unë nuk jam dhe e them sinqerisht aspak i befasuar nga përkrahja e befasishme që ka gjetur elita e krimit të organizuar sapo ne e shpallëm betejën më të skajshme kundër kësaj mortjeje që e ka tollovitur vendin 3 dekada me radhë, e që falë horrave dhe hipokritëve me kostum që kanë pasur një mikrofon në dorë e ka bërë horr Shqipërinë edhe në sytë e shumë njerëzve që shqiptarë nuk janë por që e ndjekin vendin tonë e shkruajnë e hedhin helm me kënaqësinë më të madhe për vendin tonë.
Si ka mundësi që pikërisht kur shfaqet më e thellë dhe fort se asnjëherë në 3 dekada vija e kuqe mes shtetit dhe krimit të organizuar ngrihet një koalicion kaq i larmishëm mes segmentesh dhe protagonistësh që vijnë nga gjithë rrugët e jetës publike nga mediat te i ashtuquajturi president, nga opozitat këtu para meje, e atje në rrugë, deri te avokati i popullit për ti qarë hallin këtyre të shkretëve, që kanë vrarë, përdhunuar, trafikuar ca kanë mundur, grabitur pronat, shantazhuar njerëzit dhe sipërmarrësit e qe medemek tani po dhunohen.
Po turp nuk ju vjen fare, nuk ju vjen turp gjithë këtyre njërezve që kanë një mikrofon në dorë, që dalin një një ekran, të thonë një fjalë dhe janë bërë karvan qorrash për të bërë pelegrinazhin në drejtim të qelive apo në drejtim të gjithë atyre që nuk janë kycur akoma duke cuar mesazhin që ne jemi me ju”, deklaroi ai. /Opinion.al
