Kryeministri i Mbretërisë së Bashkuar Boris Johnson, ka refuzuar propozimin e presidentit të Shteteve të Bashkuara Donald Trump për të bashkëpunuar me partinë e Brexit-it të Nigel Farange në zgjedhjet e 12 dhjetorit.
Johnson theksoi se është “mirënjohës për këshillën”, por se nuk dëshiron të bëjë pakte parazgjedhore.
Presidenti i SHBA-së Donald Trump, ditë më parë tha se Farage dhe Johnson do të ishin “një forcë e pandalshme”.
Në anën tjetër, Farage kishte kërkuar nga kryeministri Johnson që të tërhiqet nga marrëveshja e Brexit që u dakortësua në vigjilie të samitit të 17-18 tetorit dhe të bashkohen në një aleancë të përbashkët të largimit nga BE.
Mbretëria e Bashkuar do të shkojë në zgjedhje të parakohshme më 12 dhjetor, pas shtyrjes edhe një herë të afatit për largim nga Bashkimi Evropian deri më 31 janar 2020.
Johnson shpreson se do të fitojë shumicën në Parlament, në mënyrë që të miratojë marrëveshjen e arritur me BE-në, ndërkohë lideri i Partisë Laburiste, Jeremy Corbyn ka premtuar se do të organizojë referendum të ri, nëse fiton pozitën e kryeministrit.
Kryeministri britanik, Boris Johnson ka thënë në ditën e shpalljes së zgjedhjeve se publiku duhet “të zgjedhë” për të ardhmen e Brexitit, por edhe të gjithë shtetit.
Ndërkaq, lideri i laburistëve në Britani, Jeremy Corbyn është zotuar për të “transformuar” Britaninë teksa ka nisur fushatën zgjedhore. /Opinion.al
