350 zyrtarë rezultojnë të pajisur me armë, për shkak të detyrës, në bazë të ligjit të vjetër.
Të dhënat bëhen me dije zyrtarisht nga Policia e Shtetit, e cila në përgjigje të interesimit të Televizionit Klan, deklaron se deri të enjten, janë pa dorëzuar 182 pistoleta.
Në listën e zyrtarëve përfshihen Prokurorë, Gjyqtarë, Deputetë, Kryetarë Bashkie, Ish – Kryetar Komunash, Policia Pyjore, Hetimi Tatimor, Përmbarues Gjyqësor.
Nga të dhënat që disponon Policia e Shtetit, institucionet më problematike në dorëzimin e armëve të zjarrit janë Gjyqtarët dhe Prokurorët.
Me anë të një shkrese, Komisariati Numër 2 i Policisë i ka dërguar Gjykatës së Tiranës listën me 15 gjyqtarët, të cilët ende nuk kanë dorëzuar pistoletën në përputhje me ligjin e ri.
Më anë të letër – porosisë së datës 26 Shkurt të këtij viti, strukturat vendore të policisë kanë hartuar plane veprimi me detyra konkrete, të përcaktuara për grumbullimin e armëve të dhëna me leje, sipas ligjit të vjetër.
Për deputetët, Ministri i Brendshëm, Saimir Tahiri i dërgoi një letër Kryeparlamentarit Meta, duke u nisur edhe nga rasti i Deputetit Gent Strazimiri, i cili u kallëzua nga policia për armëmbajtje pa leje në protestën e opozitës në Parkun e Liqenit. /Tv Klan
