Krahas protestave, Partia Demokratike ka nisur edhe testimin e kandidatëve për zgjedhjet lokale. PD është e bindur se kryeministri Rama do të tërhiqet përballë presionit popullor.
I kontaktuar nga gazeta “Panorama”, Sekretari i Përgjithshëm i PD-së, Gazment Bardhi, konfirmoi se krahas përgatitjes për zgjedhje të parakohshme është duke u punuar edhe me përzgjedhjen e kandidatëve më të përshtatshëm për zgjedhjet vendore.
“Aktualisht, në fokusin kryesor janë protestat kombëtare dhe më konkretisht ajo e 13 prillit. Opozita e ka bërë të qartë se do të hyj në zgjedhje pa Kryeministër Edi Ramën dhe këtë proces do të duhet ta drejtojë një qeveri tranzitore. Ne si opozitë, sigurisht që jemi duke vijuar punën për zgjedhje të përgjithshme dhe vendore, përfshirë edhe përzgjedhjen e kandidaturave”, shprehet Bardhi për “Panorama”.
Mazhoranca ka bërë të ditur shtatë kandidatë për zgjedhjet lokale, ndërsa Basha gjatë një takimi në Paskuqan ka konfirmuar vetëm një: Xhelal Mziun në Kamëz./Opinion.al
