Presidenti i Ukrainës Volodymr Zelensky ka zhvilluar ditën e sotme një “telefonatë të gjatë dhe kuptimplotë” telefonike me Xi Jinping-un e Kinës. Ky është kontakti i parë që dy liderët kanë vënë që nga fillimi i luftës.
Në një postim në Twitter, presidenti ukrainas është shprehur se ai beson që biseda telefonike, së bashku me caktimin e një ambasadori në Pekin, i japin një shtysë të fuqishme zhvillimit të marrëdhënieve dypalëshe mes vendeve.
Ndërkohë, pritet që presidenti Xi Jinping të dërgojë një delegacion në Ukrainë që do të zhvillojë bisedime me të gjitha palët me synimin për të zgjidhur konfliktin.
Sipas medias shtetërore kineze, Xi e bëri ofertën gjatë telefonatës me homologun ukrainas. Xi gjithashtu u zotua se Kina do të qëndronte neutrale në konflikt duke shtuar se Pekini “as nuk do të rrijë duarkryq të shohë zjarrin, por as nuk do t’i hedhë benzinë. “Dhe aq më pak, të përfitojë nga kriza.”
Pavarësisht komenteve të liderit kinez, Kina mbetet aleati kryesor strategjik i Rusisë edhe në këto kohë lufte.
