Sezoni turistik ka nisur, dhe bashkë me të edhe aktivitetet ujore, si xhiro me Jet Ski, të cilat janë ndër atraksionet më të kërkuara në bregdet. Por, teksa shpejtësia dhe adrenalina tërheqin turistët, mungesa e kontrollit dhe moszbatimi i rregullave të sigurisë krijojnë rrezik serioz për jetën e atyre që i përdorin dhe pushuesve të tjerë.
Sipas vendimit të Këshillit të Ministrave, të datës 28.10.2020, për miratimin e rregullave të hollësishme për zhvillimin e aktiviteteve turistike detare, që kryhen nëpërmjet mjeteve lundruese për qëllime turistike dhe argëtimi, çdo operator turistik dhe çdo përdorues i mjeteve ujore me motor (Jet Ski, gomone, skafe të vegjël etj.) është i detyruar të zbatojë një sërë masash sigurie të detyrueshme. Këto masa nuk janë opsionale, janë rregulla detyruese, por në shumë raste ato injorohen.
Sipas rregullores në fuqi, një person që përdor Jet Ski duhet të mbajë:
Jelek shpëtimi, i cili mund të shpëtojë jetën në rast të një përplasjeje apo humbjeje ndjenjash.
Kokore për të shmangur çdo goditje në kokë.
Fishekzjarrë sinjalizues për vendndodhjen.
Pajisje radio EPIRB për të sinjalizuar pozicionin.
Telefon celular në një çantë të papërshkueshme nga uji.
Veshje uji të përshtatshme, që parandalon hipoterminë.
Doreza.
Këpucë të përshtatshme uji.
Syze mbrojtëse.
Rrip sigurie, që vihet në dorë dhe mundëson fikjen automatike të motorit në rast të humbjes së kontrollit të Jet Ski-t.
Por çfarë ndodh në realitet?
Pothuajse në të gjitha plazhet e Shqipërisë, përdoruesit e Jet Ski-ve nuk pajisen me kokore apo doreza. Hipin në Jet Ski vetëm me rroba banje, nuk marrin asnjë instruksion sigurie, nuk kanë mjete sinjalizimi apo komunikimi, nuk kanë kostume të posaçme dhe shpesh e drejtojnë mjetin me shpejtësi pranë zonave ku lahen pushuesit.
Përdorimi i këtyre mjeteve është shndërruar në një problem serioz për sigurinë e përdoruesve dhe pushuesve. Kjo, pasi të dhënat tregojnë se një përplasje në ujë me shpejtësi mbi 50 km/h është e barasvlefshme me një aksident automobilistik të rëndë, dhe mungesa e pajisjeve mbrojtëse rrit rrezikun për dëmtime serioze ose vdekje.
Nëse ndodh një aksident, përgjegjësia bie jo vetëm mbi operatorin turistik që jep këto mjete dhe pushuesit që i përdorin, por edhe mbi autoritetet, të cilat kanë për detyrë të kontrollojnë zbatimin e rregullave të sigurisë.
Policia e Kufirit duhet të kontrollojë këto mjete, të kërkojë dokumentacionin dhe të verifikojë ekzistencën e të gjitha pajisjeve të sigurisë përpara se t’u japë leje operatorëve turistikë apo qytetarëve, në mënyrë që jeta e pushuesve të jetë e garantuar, përpara se Shqipëria të futet në listën e zezë të plazheve të pasigurta. Tv Klan
