Ministri i Brendshëm, Taulant Balla dhe deputeti i PD-së, Flamur Noka kanë replikuar tek Komisioni i Sigurisë, ku kanë ironizuar njëri-tjetrin.
Balla u shpreh se në seancën e ditës së enjte është thirrur në interpelancë nga deputeti i PD, Ervin Salianji, ndërsa iu drejtuar Flamur Nokës: “Hajde në seancë, mos u bëni xheloz për kolegun Salianji, hajdeni ditën e enjte në seancë dhe dëgjoni përgjigjet e pyetjeve”.
Ndërsa Noka iu përgjigj se është koordinuar me kolegun e tij demokrat dhe se lufta e tyre e brendshme tashmë ka marrë fund.
Pjesë nga replikat:
Taulant Balla: Jam njoftuar nga shërbimet e Kuvendit për interpelancë me kolegun Salianji për një set pyetjesh që ka sjellë. Nuk ndodh asnjëherë të mos paraqitem në interpelancë apo seancë pyetjesh sa kohë nuk mund t’i përgjigjem një pyetje sepse unë nuk njoh asnjë institucion me emrin SKAP në Shqipëri, nuk di të ketë. E kam thënë që prioritet është lufta kundër korrupsionit brenda policisë së shtetit.
(Ndërhyn Noka)
Taulant Balla: Hajde në seancë, mos u bëni xheloz për kolegun Salianji, hajdeni ditën e enjte në seancë dhe dëgjoni përgjigjet e pyetjeve sepse i ka sjellë e numër.
Flamur Noka: Me kolegun jemi koordinuar, rrini i qetë. Ngaqë keni luftën e brendshme tuajën, ne i kemi dhënë fund luftës së brendshme
Taulant Balla: Kujtova që ka kaluar nga Gazi dhe jo nga ju, harrova
Flamur Noka: Nuk i ha kush këto! Shih merru me krimin.
Taulant Balla: Ejani në seancë dhe njihuni me rezultatet e arritura deri tani nga procesi i vetëpastrimit të policisë së shtetit.
