Tre janë pistat kryesore në të cilat Prokuroria po zhvillon hetimet për atentatin e një mbrëmje më parë në Elbasan, ku tre persona humbën jetën dhe 7 të tjerë u plagosën.
Sipas asaj që raporton Panorama Online, pista kryesore është ajo e hakmarrjes ndaj familjes Çapja, e cila njihet për një historik të pasur hasmërish që nga viti 2005, me vrasjen e Sokol Çapjes, vëllasë së Agron Çapjes të vrarë të mërkurën.
Disa anëtarë të familjes Çapja kanë qenë të akuzuar dhe të hetuar për vrasjen e Fadil Memës, biznesmenit Gentian Beqirit dhe Dritan Shemes, ndaj pista kryesore lidhet me hakmarrjen për vrasjet e sipërpërmendura.
Në këtë pistë, dyshohet se objektivi i katër personave që sulmuan me armë lokalin ka qenë Florenc Çapja, nipi i Sokol Çapjes, i cili u plagos lehtë. Pista e dytë lidhet me pazaret e drogës.
Dyshohet se disa anëtarë të familjes Çapja kanë bërë pjesë në një grup të strukturuar kriminal që merrej me trafikun e drogës. Kështu, ka rezultuar se Eno Bedolli është arrestuar në vitin 2003 për trafik kokaine në Itali.
Kjo dhe të tjera fakte ngrenë dyshime se Çapajt kishin një grup kriminal droge dhe bashkë me këtë edhe shumë rivalë.
Pista e tretë e Prokurorisë është ajo e larjes së hesapeve me Çapajt. Dyshohet gjithashtu se objektivi nuk ka qenë vetëm Florenc Hoxha, por të gjithë pjesëmarrësit në lokal natën e së mërkurës.
