PD ka zgjedhur të jetë jashtë debateve të forta që kanë mbërthyer mazhorancën 48 orët e fundit. Të paktën zyrtarisht partia më e madhe në opozitë ka heshtur përballë akuzave që LSI ka drejtuar ndaj qeverisjes, kryesisht ndaj ministrit të brendshëm Saimir Tahiri. Ish kryeministri Berisha ishte i pari që publikoi në profilin e tij në Facebook lajmin se Petrit Vasili kishte paralajmëruar deputetët dhe të zgjedhurit lokalë të LSI të bënin kujdes nga policia sepse mund të rrezikonin që punonjës të rendit të fusnin në makinat e tyre lëndë narkotike.
Po kështu dhe deputetja Majlinda Bregu postoi ne FB pa asnjë koment shtesë marrveshjen e prillit të vitit 2013 që bashkoi në koalicion PS dhe LSI. Më i qartë në qëndrimin e tij ka qenë Oerd Bylykbashi i cili po në një postim tijin në rrjetet sociale e quan përplasjen mes aletëve si një ngjarje të paralajmëruar.
“Po kush i mbajti këta hajdutë në pushtet? Po ku ishin deri para një jave, një muaji, gjashtë muajsh, një viti, para dy vjetësh a më herët akoma kur këto akuza i ngriti me prova PD dhe këta ose heshtën ose votuan së bashku dhe më pas ndanë paratë dhe pushtetin, përzunë bashkarisht njerëz nga administrata etj? Kur mbreti është i keq, edhe ai që e mban në karrige është po aq keq.
Po kur i thonim ne gjatë gjithë këtyre viteve pse nuk dolën të na mbështetnim nëse na qenkan kaq parimore? Kur prishen pazaret dhe fillon shahesh, nuk ka vlerë asgjë sepse të gjithë e kuptojnë se është qaravitje për pazaret e prishura. Po ashtu nuk ka asgjë parimore të presësh prillin për të bërë parimorin! Të thuash të vërtetën nuk të bën automatikisht të jesh i vërtetë!”- shkruan ndër të tjera Bylykbashi duke qenë të paktën deri më sot zëri i vetëm edhe pse jo zyrtarisht i PD lidhur me përplasjet në koalicionin qeverisës.
