TIRANË- Lëvizja Socialiste për Integrim deklarohet publikisht në mbështetje të reformës në drejtësi. Pasi u shpreh Komisioni i Venecias, tha Petrit Vasili, ne e dimë mjaft mirë se çfarë duhet të bëjmë.
“Miratimi i ligjit është një hap tejet i rëndësishëm për përfaqësimin politik në rrugën tonë europiane. Miratimi i këtij ligji është aksioni rëndësishëm politik që provoi se ndërtimi i konsensusit mbi parime solide është i mundur dhe është rruga që na prin për një moment të rëndësishëm për reformën në drejtësi”. Kështu u shpreh Petrit Vasili.
“LSI vlerëson raportin e Komisionit të Venecias. Konstatojmë se mjedisi politik është i gjithi në favor të reformës në drejtësi dhe kjo e bën të mundur gjithëpërfshirjen”, tha më tej numri II i LSI-së.
Sipas tij, Komisioni i Venecias është gjykatësi më i rëndësishëm i kësaj reforme. “LSI dhe grupi i saj parlamentar do të realizojë dëgjesa publike me ekspertë, akademikë të jurispudencës dhe qytetarë, me qëllim për të ecur përpara”, theksoi Vasili.
“Ne nuk kemi aktorë politikë në vend që janë kundër Komisionit të Venecias”, përfundoi ai.
