Nga përgjimet e bisedave mes anëtarëve të bandës, përmenden edhe disa shqiptarë të tjerë të lidhur me trafikimin e lëndëve narkotike nga Shqipëria drejt Italisë. “Ky grup kishte arritur të ngrinte plantacione marijuane në Shqipëri dhe prej andej e sillnin drogën drejt Italisë”, deklaroi kreu lokal i Antimafias, Marcello Tatangelo.
Detajet e këtij fakti u zbuluan falë një hetimi pesë vjeçar të Prokurorisë së Antimafias Italiane.
Hetimet filluan si rezultat i dy incidenteve të ndodhura në Sesto San Giovanni më 18 dhe 21 Dhjetor 2012 pas një shkëmbimi zjarri mes bandave rivale të drogës.
Sipas autoriteteve italiane trafikimi i drogës nga ky grup kishte dimension ndërkombëtar dhe se vetëm gjatë 2012 janë konfiskuar mbi 200 kilogramë drogë, duke përfshirë kokainë dhe marijuanë.
Luçiano Noçera, pjesëtar i grupit dhe tashmë i penduari dhe bashkëpunëtor i drejtësisë, u deklaroi autoriteteve italiane se disa vite më parë i kishte dërguar një politikani shqiptar një makinë të tipit BMW. /tv klan/
