Nga Suada Daci
Ajo është një nga këngët më të bukura të 2015-tës. Është nga ato projekte muzikore që mund ti cilësosh si “dashuri me dëgjim të parë”.
Një hit i tillë i duhej patjetër kantautorit Nesti Duka, (Stine), i cili kishte tre vjet që ishte shkëputur nga muzika për ti rikujtuar edhe njëherë publikut se ai po rikthehej fuqishëm. Asokohe kantautori simpatik kishte nisur edhe eksperiencën e tij në “Dance With Me”, një trampolinë shumë e mirë për tu katapultuar më pas në fushën që ai di të bëj më mirë, këngën…
Hitin e tij “Çifti simpatik” Stine e paralajmëroi në 22 shtator (puntatën e parë të DWM), por atëherë askush nuk ishte i vëmendëshm se çfarë bluante ai në kokë. Alketa pyet se si mund ta cilësonin njerëzit çiftin Stine dhe Roza (që vite më parë kishin përjetuar një histori dashurie) dhe kantautori i cili i kishte idetë shumë të qarta është përgjigjur menjëherë “çifti simpatik”. (Video min 5:21)
Nuk vonoi shumë dhe erdhi nëntori… Kantautori Stine u prezantua në Kënga Magjike me këngën “Çifti simpatik”, projekt që ngjiti menjëhere dhe u kthye në këngën e të dashuruarve, klubeve e makinave. Asokohe u përfol se kjo ishte një këngë dedikuar Rozës, por ajo qëndronte në “file-t” muzikore të Stines që prej dy vitesh, për të dalë fiks në kohën e duhur. Kënga “Çifti simpatik”, e cila fitoi çmimin e diskografisë në KM, është kënga më e klikuar në You Tube e këtij spektakli ( me mbi 6 milion klikime).
“Këngën e kam punuar dy vjet më parë dhe siç e dëgjoni nuk kam përpunuar fare më pas”, thotë për Opinion.al këngëtari të cilin e kemi vizituar në studion e tij muzikore, ku na ka treguar demon e parë të ‘Çiftit Simpatik” si dhe të tjera projekte muzikore.
“Këngën e radhës e kam vonuar qëllimisht, pasi është shumë e vështirë të sjellësh një këngë nën nivelin e “Çiftit simpatik”. Jam ndërmjet një balade pop rock dhe një kënge më ritmike, por kam përshtypjen që do të fitojë kjo e dyta”, thotë kantautori për Opinion.al.
Sigurisht që nuk mund të mos e dëgjonim këngën të cilët pritet të prezantojë Stine. Ajo është shumë ritmike, tejet verore dhe mbi të gjitha shumë e gëzueshme. Do të zbulojmë vetëm pak detaje (urojmë mos të mërzitet Stine), ajo do të jetë e ritmeve reggaton.
Kantuatori na ka folur gjithashtu edhe për lajmin e shtatzënisë së partneres së tij Gracielës, duke pohuar që është shumë i lumtur dhe se gjithçka ka ardhur në kohën e duhur.
