Rreth orës 17.30 të ditës së sotme, Kombëtarja do të zhvillojë seancën e fundit stërvitore para nisjes për në grumbullimin e Francës. Në përfundim të saj, trajneri i përfaqësueses do të bëjë publike listën me 23 emrat e futbollistëve që do të marrin pjesë në Euro 2016.
Rrjedhimisht do të kthehen në shtëpi 4 nga 27 të grumbulluarit në Austri. Do të jetë e vështirë dhe e dhimshme, ka thënë De Biasi, pasi të gjithë meritojnë të jenë në europian.
Edhe mbrojtësi Ansi Agolli thotë se ky është një moment i vështirë për të gjithë.
Më të rrezikuarit për t’u lënë jashtë liste janë Frederik Veseli, i cili është stërvitur fare pak me skuadrën, si dhe Herolind Shala, i cili edhe pse është grumbulluar gjithnjë nga trajneri, nuk është aktivizuar në takimet eliminatore.
Lojtarë të tjerë, që rrezikojnë seriozisht të jenë jashtë liste janë Milot Rashica, që nuk shihet nga trajneri si alternativë serioze, apo edhe Andi Lila, që është në balotazh me Burim Kukelin, por ky i fundit ka më shumë shanse për të qëndruar.
