Bujar Lako, aktori me talentin dhe zërin e rrallë mbylli sytë në moshën 68-vjeçare. Një atak në zemër, mëngjesin e së hënës, ishte shkaku i vdekjes së parakohshme.
Bujar Lako, me 44 vitet e karrierës së tij mbi supe, është njohur me shumë emra të lidhura me rolet më të spikatura në kinematografinë shqiptare.
Karrierën e nisi sapo përfundoi studimet në vitin 1973, si aktor në Teatrin Kombëtar dhe shpejt kaloi në kinematografi. Nga filmat “Përballimi” dhe “Në fillim të verës” do të kalonte në produksionin mbase më të spikatur, për të cilin ai do të kujtohet gjatë me rolin e Halit Beratit, në filmin “Gjeneral Gramafoni”, por edhe me rolin Mujo Bermemes, komandantit shqiptar të bazës ushtarake të Pashalimanit në filmin “Ballë për ballë”.
Filmat, të cilët mbajnë të spikatur rolin e tij, janë të shumte dhe në kinematografinë e para viteve ’90, prania e Bujar Lakos i jepte sukses të garantuar filmit. Edhe më pas, aktori pati një jetë të ngjeshur artistike me role të ndryshme.
*Foto nga shfaqja “Kush e solli Doruntinen”
Por vetëm para pak muajsh Bujar Lako së bashku me aktoren Margarita Xhepa, Viktor Zhusti, sollën në skenë novelën e Ismail Kadare “Kush e solli Doruntinën”. Shfaqja u soll në skenën e Teatrit Eksperimental “Kujtim Spahivogli” në shkurt të këtij viti në Tiranë.
Në këtë shfaqje interpretuan emrat të njohur shqiptarë si Margarita Xhepa në rolin e zonjës mëmë, Bujar Lako i cili ishte në rolin e kryepeshkopit dhe në rolin e murgut Viktor Zhusti, ndërsa pjesë e kastit ishin Luli Hoxha me rolin e Doruntinës, si dhe aktorët Mimoza Marjanaku, Suela Bako, Eralda Caushi, Gjergj Doçi, Amos Muji Zaharia dhe Xhejni Fama.
Kjo shfaqje erdhi e plotë dhe e pacensuruar, ky do të ishte filmi i fundit në të cili do të shikonin Bujar Lakon duke interpretuar në skenë./opinion.al
