Vëllai i Bledar Terpollarit i bën apel policisë të arrestojë kushëririn e tij, atë që i ekzekutoi vëllanë. Ai thotë se familja e tyre ndihet e rrezikuar, ndërkohë që shton se vrasësi ndodhet në Skrapar.
“Nuk e besoja kurrë që vëllai ishte vrarë nga kushëriri im. Akoma nuk e besoj dot. Ai e bëri atë krim dhe do paguajë për këtë. Shteti duhet ta gjejë sa ma parë dhe ta arrestojë të afërmin tim. Bashkëfshatarët më kanë thënë se Krenarin e kanë parë në pyll. Gjithashtu, më kanë thënë se vrasësi i vëllait tim është i maskuar, pasi ka frikë se e identifikojnë dhe e kapin. Ai fshihet në Skrapar, ndaj policia duhet ta arrestojë sa më parë, pasi kemi frikë” thotë ai për “GSH”.
Ai thotë se ndihet i frikësuar për familjen, pasi ai në çdo moment mund të vrasë familjarët e tjerë, siç bëri edhe me vëllane. “Ai është monstër dhe jo njeri. Nuk kam frikë për vete, sepse nuk më dhimbset më jeta, por kam frikë për fëmijët, prindërit dhe vëllezërit e tjerë” shton i riu.
Sipas tij familja mban kontakte me hetuesit grekë për detajet e hetimit. “U kam kërkuar që të më sigurojnë mbrojtje, por më thanë se këtë duhet ta bëjë shteti shqiptar. Kur u zbulua vrasja, policia greke më mbajti 4 ditë në paraburgim” thekson Terpollari.
Në emer të familjes ai apelon per gjetjen e kokes, që vëllai të prehet i qetë. “Ndërsa kërkoj mbrojtje të menjëhershme nga shteti im, sepse autori monstër ndodhet në fshat”./ Panorama
