Fshati i parë Ekologjik në Shqipëri “Agavia Village” ndodhet shumë pranë Gjirit të Portopalermos dhe kalasë së njohur të Ali Pashë Tepelenës, e rrethuar me agavie dhe pisha. Gjiri ka shërbyer që në kohët e lashta si një port mbrojtës natyror për anijet e shumta ashtu si dhe sot ku ankorohen shpesh anije.
Ky gji mbart gjurmë të vjetra të ankorimeve në shekuj, disa guva dhe një reliev nënujor mjaft dinamik për zhytësa amatorë dhe profesionistë. Guvat e shumta rrotull kalasë, copëza të ankorimeve të lashta dhe pasuria natyrore e këtij gjiri e bëjnë atë një nga destinacionet më të preferuara të Rajonit të Ballkanit dhe Evropës.
Eko-sistemi i këtij vendi, qetësia dhe kthjellësia e ujërave të tij ka tërhequr jo rrallë herë dhjetëra delfinë të cilët afrohen shumë pranë bregut të gatshëm të bëhen miqtë tuaj të rinj.
Një zgjidhje e veçantë është bërë për energjinë elektrike. I gjithë ndriçimi i brendshëm i bungalove dhe ndriçimi i jashtëm i rrugëve sigurohet nga energjia diellore nëpërmjet paneleve fotovoltaike dhe llambave super ekonomike LED, ndërsa energjia për frigoriferët është siguruar nga energjia e erës e cila është e bollshme në këtë gji. Këto zgjidhje të sigurimit të energjisë së rinovueshme, janë një rast i veçantë, i realizuar për herë të parë në Shqipëri.
