Donald Lu, ambasadori i SHBA-së në Tiranë katër ditë më parë deklaroi se ky shtet u kishin ndaluar hyrjen në territorin e saj disa gjykatësve shqiptarë duke iu refuzuar apo anuluar vizat.
Deklarata e ambasadorit nuk dha më shumë detaje për këtë “listë të zezë”. Por, burime pranë Ambasadës Amerikane në Tiranë thanë për “Panorama Online” se, SHBA këto vendime i ka marrë mbi informacione që ka nga disa burime, ku rol të veçantë luan pasuria e pajustifikuar e zyrtarëve.
“Vendimet për refuzimet e vizave për zyrtarë të lartë të korruptuar nuk bazohen vetëm në një burim të vetëm informacioni. Ne shqyrtojmë një shumëllojshmëri informacioni që kemi në dispozicion për t’i marrë këto vendime, përfshi informacionet mbi asetet personale”, tha për “Panorama Online” burimi.
Ambasada nga ana tjetër inkurajon Inspektoratin e Lartë të Deklarimit të Pasurisë dhe Kontrollit të Interesave si dhe median dhe shoqërinë civile që të vazhdojnë të hulumtojnë historikun dhe asetet e zyrtarëve të lartë dhe të bëjnë publike shenja të korrupsionit të mundshëm. “Ky është vetëm fillimi. Kemi shumë më tepër punë për të bërë për të luftuar korrupsionin”, mbyllej reagimi i ambasadorit të SHBAve në Tiranë, Donald Lu.
