“Burg pa afat deri në përfundim të hetimeve”. Kjo është masa e sigurisë për tre të arrestuarit e katër ditëve më parë nën akuzën se kishin planifikuar kryerjen e një vrasje me pagesë, në Manzë të Durrësit.
Gazmend Dervishi, Bruno Shehu dhe Dritan Nikolli kanë dalë në mesditë para trupit gjykues, i drejtuar nga gjyqtarja Anita Mici.
Seanca për caktimin e masës së sigurisë është bërë me dyer të mbyllura.
Të tre këta persona akuzohen për vrasje të mbetur në tentativë dhe armëmbajtje pa leje.
Por edhe pse janë arrestuar në kushtet e flagrancës, ata kanë mohuar të dyja akuzat, duke thënë se nuk kishin për qëllim ekzekutimin e ndonjë personi.
Sipas Policisë së Durrësit, shtetasit e mësipërm, janë eksponentë me rrezikshmëri të lartë kriminale, të cilët dyshohen të kenë kryer edhe më parë krime kundër personit dhe trafikimit të lëndëve narkotike.
Katër ditë më parë policia i ndaloi pasi dyshimeve të arësyeshme se ata do të ekzekutonin kundrejt pagesës prej 10 mijë eurosh një person që dyshohet se kishte rivalitet kriminal me një tjetër grup të trafikimit të lendëve narkotike. /Tv Klan/
